Buonas Fiestas!

 

La Chama de l pobo

 

Ls lhumes parecien nacer an bários sítos de l çcampado. Cumo se spertássen la fiesta. Las pessonas astrebien-se a saltar las labaredas i andában an correlinas a la buolta. Páixaros de lhibardade. I la chama chubie . La chama, las pessonas, las risadas i las castanhas tamien arrenbentában ne l aire. Las manos yá stan aquestumadas a sacá-las de la brasa. I por ende la lhéngua mirandesa amerosaba la palabra q’andaba de boca an boca. I quien nun sabie querie daprender. Cuido que l cielo i l riu s’ajuntórun pula quelor poética que tenien. I se ne ls lhumes ganhaba la mocidade yá ne l baile éran ls que tenien mais eidade que se çforrában, i bien, dua bida de trabalho. Beilában las modas de la tierra: l pingacho, las lhigas berdes, senhor Galandum, giriboilas…I ne l repasseado, la dança percipal, trocában de par i beilaba to l mundo. Era la ruoda de las gientes de la raia. Ua ruoda que tiraba las maleitas i ls delores, que ls uossos ban gastos. La comida i la buída rolában a ringalheira. Las mardomas ponien cun proua la puosta, las chouriças, la barbada de cochino i las sardinhas que de l mar s’achégan al praino. I quaijeque que nun las deixában assar. Yá sabemos que l cheiro aguça l apetite. I cun l pan de Paradela que bien sabien! I ls sodos, las roscas, las bolhas doces i de chicha, i l queiso de las cabras, tan fresquito, acabado de fazer. Neste magosto ye todo a baler.

 A camino de l assomadeiro de Paradela hai un castanheiro centenairo que ganhou, an 1999, l purmeiro prémio ne l cuncurso "An busca de la maior arble de l parque Natural de l Douro Anternacional". Ten 16,90 metros de altura, 4,90 metros de perímetro i un diámetro médio de la copa de 23,90 metros. Ye ua proua para Paradela, cumo se l’arble de la castanha tubisse algo sagrado. Ye l lhugar adonde purmeiro nace l sol an Pertual. Talbeç por isso hai un reloijo crabiado na peinha. Deilhi se bei la barraige de l Castro, de nuossos bezinos spanholes. Soubimos pul’antarneta, que l purmeiro decumiento desta aldé ye de 1145 que diç que Paradela pertencie al Arcebispo de Braga, que tenie ende ua albergarie. Ye tamien eilhi que l riu Douro entra an tierra pátria i brilha i quelobreia cun ganas de bailar culas arribas, para dar-le l sangre de la bida. Bie-se que ls burricos que benien de l passeio terminado para esse die, stában agora mais assossegados. I habie turistas que chegórun neilhes chubidos. Benírun d’apeto! I jurórun nun tornar a faltar al magosto de l’aldé. Até se fazírun amizades pul Facebook. Quejírun partilhar ls questumes de l pobo, por apego a ua cultura que nun quieren deixar apagar. Cumo se por ende tubíssen nacido. 

Era la fiesta de la castanha, 

Cumo naide tenie bisto 

L magosto de l pobo. 

Fraitas, tambores i gaitas de fuolhe bibrában 

Ne l cuorpo i ne coraçon. 

Era la música mirandesa, 

La música de siempre que pul mundo 

S’agarra a quien la sinte.

Teresa Almeida Subtil