L outonho anda an risadas
Quaije que se le cáien ls dientes
Cumo meligranas burmeilhas
De doçura i calor.
Por cierto stan chegando ls frius
Mas anquanto puodas
Bota las piernas al aire
I bai amplachando las parreiras
I fazendo tapetes anramalhetados.
Para ber beilar amplache
Ciganas adebinas de Torga.
Gusta-me l outonho
Andar çcalca pulas binhas
Pintar la natureza cumo se l sol
Arrebentasse an cada pumiento
I you le sentisse an cada dentada.
I la sardina a arrepelar-se nas brasas
A molhar l pan
I ls Montes Ermos a correr
Pul gorgomilho de ls bendimadores
Que de cansados
Se bótan a drumir na tierra amada.
Teresa almeida Subtil
Glossairo
adebinas - adivinhas
amplache - despido
anramalhetado - florido
çcalça - descalça
framante - luzidio
gorgomilho - goela
meligrana - romã
